Wararka

Turkiga iyo Sacuudiga ayaa ku heshiiyey inay sii furnaadaan marinada wada hadalada…


Madaxweynaha Turkiga Recep Tayyip Erdogan ayaa kala hadlay Boqor Salmaan-ka Sacuudiga sidii lagu xoojin lahaa xiriirka labada dal, oo aad u xumaaday wixii ka dambeeyey dilkii weriye Jamaal Khashoggi, sida uu sheegay xafiiskiisa.

Wada-hadalka labada hoggaamiye oo ku dhacay qadka taleefonka ayaa yimid ka hor shirka dalalka G20 ee Riyadh oo qaab online ah u furmay Sabtidii.

“Madaxweyne Erdogan iyo boqor Salmaan waxay isku raaceen inay sii furnaadaan marinada wada-hadallada, si sare loogu qaado xiriirka labada dhinac, islamarkaana xal loogu helo arrimaha taagan,” ayaa lagu yiri qoraal kasoo baxay madaxtooyada Turkiga.

Turkiga iyo Sacuudiga ayaa muddo ku loolamayey hoggaanka dunida Muslimka, hase yeeshee xiisadda ka dhex oogan ayaa cirka gashay markii qunsuliyadda Sacuudiga ee Istanbul lagu dhex dilay weriye Jamaal Khashoggi, bishii October 2019.

Kiiskan ayaa dhaliyey dhalleeceyn caalami ah, wuxuuna si weyn u dhaawacay sumcadda dhaxal-sugaha Sacuudiga Mohamed Bin Salman, kaasi oo lagu eedeeyey inuu ka dambeeyey dilka, eedeyntaas oo Bin Salman uu beeniyey.

Erdogan ayaa sheegay in amarka lagu dilay Khashoggi, oo ahaa weriye Sacuudiyaan ah, uu ka yimid mas’uuliyiinta sare ee Sacuudiga, hase yeeshee si toos ah uguma eedeyn Mohamed Bin Salman.

Shabakada wararka, hagaag.com info@hagaag.com

About Admin (12894 Articles)
Wararka Somalia iyo kuwa caalamka ayaan idinka haqab tireynaa.
%d bloggers like this: