Wararka

Jubbaland ayaa sheegtay in aysan gudbin doonin guddiyada doorashada ilaa laga fuliyo…


Madaxweyne ku-xigeenka Dowlad Gobolleedka Jubbaland Maxamuud Sayid Aadan ayaa sheegay in aysan gudbin doonin gudiyada doorashada ee laga sugayo inta laga fulinayo ayuu yiri heshiisyadii iyo balanqadyadii ay horey u sameysay dowladda dhexe ee Federaalka.

Dowladda Soomaaliya ayuu ku eedeeyay in aysan wali fulin heshiisyadii ahaa in gobolka Gedo loo madax-bannaaneeyo dowlad gobolleedka Jubbaland ka hor doorashada, isaga oo sheegay in dowladda dhexe damacsan tahay in ay iskeed u maamulato doorashada la filayo in ay ka dhacdo gobolka Gedo.

”Annaga waxeynu rabnaa in marka hore gobolka gacanteena lagu soo celiyo, dowladdu iyada ayaa ka baxday heshiiskii horey aynu galnay, mas’uuliyada arintanna iyada ayaa qaadeysa ayuu yiri” Maxamuud Siyad Aadan.

Ma’aha gobolka Gedo oo kaliya sidoo kale Maxamuud Siyad Aadan ayaa sheegay in dowladda federaalka si guud ugu tumaneyso sharciyadii lagu heshiiyay ee doorashada oo ay aheyd in laga qeybgalo dhinacyada ay khuseyso oo idil, sida siyaasiyiinta mucaaradka, isaga oo si gaar ah u soo qaatay xadgudub uu sheegay in lagu sameeyay guddiyada doorashada gobollada Waqooyi..

”Waa in dhamaan qaladaadka ka jira dhinaca doorashada la saxaa sida guddiyada hadda dhisan oo qeylo badan ka soo yeertay sida guddiyada gobollada Waqooyi oo ay aheyd in loo madax-bannaaneeyo guddoomiyaha Aqalka Sare Cabdi Xaashi Cabdullaahi” ayuu hadalkiisa sii raaciyay madaxweyne ku-xigeenka Jubbaland.

Jubbaland iyo dowladda dhexe ee federaalku muddo dheerba ma fiicneyn xiriirkooda tan iyo wixii ka danbeeyay doorashadii Axmed Madoobe oo ay dowladda ku tilmaantay mid sharci darro ah.

Shabakada Wararka, hagaag.com info@hagaag.com

About Admin (12802 Articles)
Wararka Somalia iyo kuwa caalamka ayaan idinka haqab tireynaa.
%d bloggers like this: