Wararka

Shirkii ka socday Dhuusamareeb ayaa la sheegay inuu natiijo la’aan ku soo dhammaaday…


Wararka ka imaanaya Magaalada Dhuusamareeb ayaa sheegaya in uu natiijo la’aan ku soo dhammaaday shirkii wadatashiga ee maalmahaanba magaaladaasi uga socday Madaxda Dowladda Federaalka, Dowlad Goboleedyada iyo Gudoomiyaha Gobolka Banaadir.

Ka dib shir aan loo kala kicin oo saacadihii ugu dambeeyay ka socday Magaalada Dhuusamareeb ayay madaxdu ku guuldareysteen inay xal ka gaaraan arrinta Gobolka Gedo iyo sharci ahaanshaha cidda magacaabeysa Xubnaha Guddiga Doorashooyinka ku metelaya Gobolada Waqooyi.

Madaxweynaha Jamhuuriyadda Somalia, Maxamed Cabdullaahi Farmaajo, Madaxweyne-yaasha Puntland iyo Jubbaland, Siciid Cabdullaahi Deni iyo Axmed Maxamed Islaam (Axmed Madoobe) ayaan wax xal ah u helin arrinta Gobolka Gedo.

Madaxweyne-yaasha Galmudug, Hirshabelle iyo Koonfur Galbeed ayaa geed gaaban iyo mid dheerba u fuulay, sidii horumar looga samayn lahaa arrinta Gedo, balse aan wax is afgarad ah laga gaarin.

Qodobka kale ee doodda badan dhaliyay ayaa noqday cidda soo magacaabeysa Xubnaha Guddiga Doorashooyinka ee Somaliland, ee soo xulaya Xildhibaanada.

Madaxweyne Farmaajo ayaa ka biyo diiday in Gudoomiyaha Golaha Aqalka Sare, Cabdi Xaashi Cabdullaahi uu soo magacaabo Xubnaha Guddiga Doorashooyinka.

Gudoomiye Xaashi oo mar sii horeysay khadka teleefanka la soo geliyay intii uu shirka socday ayaa markale ku dooday inuu yahay masuulka ugu sareeya Dowladda Federaalka ee ka soo jeeda Gobolada Waqooyi, isla-markaana uu isagu yahay kan mudan magacaabidda Xubnaha Guddiga Doorashooyinka. Xaashi ayaa sidoo kale ka horyimid in arrintaasi uu iskaashi kala sameeyo Ra’iisal Wasaare Kuxigeenka Dalka, Mahdi Maxamed Guuleed (Khadar).

Dhanka kale Madaxweyne Farmaajo ayaa waxaa lagu wadaa in saaka uu u ambabaxo Magaalada Muqdisho, si uu khudbad ugu jeediyo Xildhibaanda Labada Aqal.

Gudoomiye Xaashi waxaa uu Jimcihii sheegay inaanu Madaxweynuhu soo codsan in si wadajira uu ula kulmo Xubnaha Labada Aqal.

Tani waxay imaaneysaa, iyadoo Golaha Midowga Musharaxiinta uu ka horyimid muddo kordhin, wixii ka dambeeya 8-da bishan, oo ku eg muddo xileedka Madaxweynaha.

Shabakada Wararka, hagaag.com info@hagaag.com

About Admin (13285 Articles)
Wararka Somalia iyo kuwa caalamka ayaan idinka haqab tireynaa.
%d bloggers like this: