Wararka

RW Rooble iyo Midowga Musharaxiinta ayaa shir uga bilowday Hotel Decale ee Magaalada Mogadishu…


Waxaa goordhow shir uga bilowday Hotelka Decale Ra’iisul Wasaare Rooble, Midowga Musharaxiinta, Madaxweynaha Hirshabelle iyo Guddoomiyaha Gobolka Banaadir, iyadoo shirkan looga hadlayo arrimaha doorashooyinka iyo dhaqan gelinta heshiiskii Khamiistii hore ee sababay in xiisadii ka jirtay magaalada Muqdisho ay qabowdo.

Shirka maanta ayaa waxaa ka qeyb galaya Ra’iisul Wasaarihii hore Xasan Cali Kheyre oo shirkii khamiistii la soo dhaafay uga baaqsaday sababo gaar ah.

Xubnaha Midowga Musharaxiinta ayaa shirka maanta la tagaya sidii loo bilaabi lahaa baaritaanka madaxa bannaan ee dhacdadii 19 February ee ahaa weerarkii Madaxweynayaashii hore iyo rasaastii lagu furay dibad baxayaashii ay hoggaaminayeen qaar ka mid ah Musharaxiinta.

Ilo ku dhow dhow shirka aya sheegaya in arrinta doorashada si gaar ah looga hadli doono, iyo sidii Xubnaha Midowga Musharaxiinta qeyb uga noqon lahaayeen.

Waxaa la filayaa in Ra’iisul Wasaare Rooble uu qaato door uu isugu yeero dowlad goboleedyada, lana isugu yimaado shir maalmaha soo socda, si Muqdisho loogu saxiixo qodobadii Baydhabo xalka looga soo gaaray ee Guddiga Farsamada ka soo shaqeeyeen.

Ra’iisul Wasaare Rooble ayaa hadda u muuqda inuu door ka qaadanayo xallinta caqabadaha ka jira hirgelinta doorashada, waxaana Beesha caalamka ay dhowr jeer ka dalbadeen inuu qaato kaalintiisa hoggaamineed.

Shabakada Wararka, hagaag.com info@hagaag.com

About Admin (13840 Articles)
Wararka Somalia iyo kuwa caalamka ayaan idinka haqab tireynaa.
<span>%d</span> bloggers like this: