Wararka

Shirkii lagu dhameystirayay arrimaha doorashooyinka ayaan u muuqan mid maanta…


Maanta la filayay in Magaalada Muqdisho uu ka furmo shirka lagu dhameystirayo arrimaha doorashooyinka ee dalka, laakin ma muuqato saansaan shirkaasi la xiriira.

Madaxweyne Maxamed Cabdullaahi Farmaajo ayaa habeenkii Isniinta iclaamiyay shir 4-ta bishan oo maanta ku beegan ka dhacaya Magaalada Muqdisho, laguna dhameystirayo wadahadaladii la xiriiray hirgelinta doorashooyinka dalka, ee u dhexeeyay Dowladda Federaalka, Dowlad Goboleedyada iyo Maamulka Gobolka Banaadir.

Madaxda Dowlad Goboleedyada Jubbaland iyo Puntland ayaan weli imaanin Magaalada Muqdisho, halka Madaxweyne-yaasha Koonfur Galbeed iyo Galmudug ku maqan yihiin Magaalada Ankara ee dalka Turkiga, taasoo meesha ka saareysa suurtagalnimada in shirka uu maanta furmo.

Ilo wareedyo ayaa sheegaya inaanu wax abaabul iyo dhaqdhaqaaq midna ka jirin Aqalka Villa Somalia, halkaasoo uu Madaxweyne Farmaajo qorsheeyay in shirka lagu qabto.

Puntland iyo Jubbaland ayaa iyagu ka cago-jiiday in shirka uga qaybgalaan Qasriga Madaxtooyada, taasi bedelkeedana waxay Puntland ku baaqday in lagu qabto Garoonka Aadan Cadde, halka Jubbaland ay soo jeedisay in shirkaasi uu ka dhaco goob amnigeeda lagu kalsoon yahay.

Haddii uu fashilmo qabsoomidda shirka maanta ayaa waxay noqoneysaa markii 3aad oo inta uu Madaxweynuhu shir isugu yeero Dowlad Goboleedyada aan qabsoomin, wixii ka dambeeyay 8-dii bishii February oo ku ekeyd muddo xileedka Madaxweynaha.

Shabakada Wararka, hagaag.com info@hagaag.com

About Admin (13838 Articles)
Wararka Somalia iyo kuwa caalamka ayaan idinka haqab tireynaa.
<span>%d</span> bloggers like this: